Ako gospostvo (gospojstvo), kako besida kaže, odaje odnos gospodara prema slugi, onda sluga koji po svojoj voji parti utijo ne želeći gospodara na svome ispraćaju šaje, zapravo, gromoglasnu poruku koja gospodarevo gospostvo ozbiljno dovodi u sumju. A Jure je bija sluga takvi vrlina i manira da se u bilome dvoru ponekad nije znalo ko je sluga, a ko gospodar.
Bija je umitan i vridan do te mire da je okolo njega sve cvalo i vonjalo, pa se dvor učas zakitija najlipšin cvićen vonjajući nadaleko. Jure je cva, a njegovome gospodaru u botu su se divili i zavidili mu. Bilo i' je ča bi sve dali da su mogli jemat Juru u cvitu njegove mladosti, ma je Jure osta viran i svome dvoru i svome moru.
Kako je vrime pasalo, doša je dan kad je i Jure mora u svit učinit šolde dok se more, ma se Jure i na vijađu spominja svoga gospodara jedva dočekavši dan da se vrne meju svoje u bile mu dvore. Inšoma, srića Jurina nije bila duga vika jerbo je gospodar naša nove sluge i s vrimenon zaudobija Juru koji mu je, dok je moga, virno služija. Nije Jure zara tega činija ni dišpete ni škerce vengo je patija potajice, ma su batikori u njemu žestoko ribumbavali sve dok napaćeno tilo nije reklo: Dosta je, Jure, ja ne moren više!
I zara tega je Jure, po svojoj voji, parti tijo da ne more tiše. U raj ga poveli bili anđeli!
Prilog o velikome meštru baluna iz pera meštra o' riči Marija Garbera možete pročitati ovdje: jurica-jerkovic.pele-i-maradona
