– Mare, jesi li čula da vonja dim?

– Kakav dim?

– A kažu da gore Tugare, Žrnovnica, Kila, Klis i Rupotine!

– A nisan. Ženo pusti me s miron. Stižu mi furešti u dvi ure a ja lancune još nisan ispeglala.

– Oli za to nemaš nevistu? Ča ti ona čini?

– Ma neman ti ja nikoga. Ona je maloprin otišla u Vlašku, di ono… Dračevac, Mejaši, šta ti ja znan… Tamo odakle je njeno pleme.

– Pa šta će tamo bidna? Je li vazela pasoš?

– Ne kaže se pasoš, vengo putovnicu. A otišla je, ko bi je zna zašto. Još kaže da ide jer da joj gori tamo kuća. Moš mislit. Gori i meni ovde a nikoga neman da mi da ruke. Jadna starosti…

– Mare! Evo kažu na portalu“ Dalmacija Dalmaciji za Dalmaciju“ da se požar približija Pujankama!

– Pujankama?! Ajde Zore, gospu mu, šta me plašiš bezveze. A ima na te Pujanke dovoljno svita, to je gori iza brda. Isto u Vlašku. A meni ova moja Ingležina jučer kaže da san puno lipa. Ko da stavljan botoks! Fini je to svit. Iako su nekad i malo brezobrazni. Jučer stalno pitaju perune, teće, ne bi ih bog namirija…

– A znan… nemoj mi ništa govorit. Meni su sami Kinezi već misec dana. Ja to ništa ne razumin.

– Aj reci pošteno… Kolika je Kina i oni ovde nama u Varoš dolaze snimat onu fonju kraj Mirkove vile…

– Ni ja ih ne kontan, matere mi Anježe, bog jon da pokoj vični…

– Ma sve ih razumin kad muču, a najgore kad počnu govorit…

Nego Mare!! Piše na Internetu da je požar proguta po grada! Stiga je do Koteksa!!

– Do Koteksa!? A Zore moja otkad ti ja tamo nisan bila. Mene je sram kazat. Zadnji put 79. godine, kad je drug Tito bija u Split. Taman smo onda radili treći kat i karali se sa Marinkovin braton Prošperon… I njega nije srića puno popišala…

– Eno vidi se požar, gre prema Rivi!!

– PREMA RIVI!? Di su sad vatrogasci?! Kakva je ovo država!? Kome mi plaćamo poreze! Sram ih bilo! Šta je ovo! Svi ćemo izgorit! Jadna ti san. Izgorit će nam kuća!! O „Vilo Mare“ moja!

– Govori ovaj naš premijer da je sve u redu. Da je požar interesantan i atraktivan. Rutinski.

– Ajme Zore moja… Mogu ti kazat da i je. Volin ja tega čovika vidit na televiziju. On uvik nekako sve mirno kaživa… Pravi je… On i oni Vitez. Ne mogu mu ime zapametit. Oni likar…

– Mogu ti kazat da mi je sad puno lakše. Gren na katamaran po svoje nove Kineziće. Poslali su mi poruku na oni Viber da ne mogu pristat u Luku. Da sve gori ali da snimaju sve i da in je puno interesantno. Da petaju film na Internet. Šta će svit…

– Ma pusti ih onda. Neće more izgorit. Nije nikad do sad izgorilo.

– Jemaš ti prav! Najgore ti se sekirat. Lako je meni za vatru…

– Gren i ja lancune prostrit. Neka vidi cili svit koliko mi je nevista pomogla.

– Pokaži jin! Neka se zna!

(svi izgorili u požaru, sutra došla Vlada slikat se sa preživjelima i obećali sagradit ½ trafostanice na Kili)