Je da san jučer okisa, bi san mokar, moglo se ožažimat roba sa mene, zaraj one lude kiše i onega još luđega šofera tonobila, ali ono ča se dogodilo jučer sa kišon jema i ništo dobrega.
Zamutila se voda na izvoru Jadra, govoru da je ne vaja pit, da moš jemat problema sa trbujon i črivima i jutros ćin san se zdiga iz posteje, omar san noćnemu kovaču reka, ni svako zlo, za zlo .
Nikako me blido pogledala ni ništa razumila, ni joj ništa bilo jasno, a ja cvitan od sriće. Znan sad će te vi pitat, ča jema u temu dobrega ča se voda zamutila i ča se ne smi pit.
E jema. Umisto vode vaja pit vino i to je ono ča je dobro i ono čemu se ja veselin.
Kad je čula čemu se veselin, omar se zdigla i mekla prokuvat vodu, a ja san poludi, ča će ti to, oli ne čuješ da to ne vaja, oćeš da me dišturba trbuj, da me igrava, oli da se infetan.
Danas i dok ovo sa muteži ne ferma ne pijen vodu niti u čaju i jemaš da mi kuvaš čaj od ruma, oli šćete rakije sa nikoliko kapi vode, a tu prokuvanu vodu mogu popit jedino u kafu i to onu prvu jutarnju da se osvistin.
Našla je ona ždronj jer govori da će kupit vodu u plastiku u butigu. Gospe mi nećeš, jer neću ja pomagat Gazdu da mu budu manji dugovi, a kako si inšenpjana ti bi to učinila i ako doneseš doma tu vodu u bocu bacit ću je kroz ponistru.
Ča ti oćeš da ja penšjunat pomažen krupni kapital, a on se šeta po Londri, smije se i zajebaje cilu državu i daje za njega ofertu, da ga pustu iz prežuna. Jedna njegova boca vode zapada funtu, a sto ijad boc more popit u jedan dan po Splita i to samo za obid i eto ti pinez za kupit slobodu. Nećeš, ne dan za tega mazguna pineze jer dobar dil oni koje je on opljačka danas radu za milostinju i umiru o straja oće li ostat brez posla i od ćega će živit, a on će šetat sa ženon i dicon Londron, a po građana Hrvatske ne more poć ni iz mista di stojidu do drugega mista jer nimaju pinez.
Misli san da je razumila moje beside, složila se sa njima i govori mi, ajde dobro kupit ću ti oni ladni čaj, samo san je pogleda i reka, znaš ča ,ništa nisi razumila i ja gren sa mojin utorkašima na obid, jemamo danas gulaš sa bobon i doć ću doma pozapodne, a ti čini ča oćeš samo ne kupuj vodu, ne prokuvavaj, a najmanje ča mi triba je ledeni čaj jer je to ista butiga, ali ti ništa ne razumiš, a ča ću ja kad si inšenpjana.
Ako greš u butigu i jemaš pinez, vazmi koju bocu onega plavca ča jema tovara na botilju, jer ja san ipak težaškog porijekla i to me more razveselit, a ne ti tvoj ledeni čaj od kojega mogu dobit upalu grla i mogu mi se upalit gnjandole.
