Evo opet nas toka poć kupovat vodu? Nikad do prin godinu dan ni u Split padala kiša jer kad bi jemala past razapeja bi se veli šator od izvora rike Jadro i pokri bi cili Split.

Ma koga oni evo već drugi put u nikoliko miseci za*ebaju. Biće jopet gre slabo Konzumu, oli drugin butigama pa vaja pokupovat svu vodu ča ih drže na stalažama i onda izmišljaju mutež vode.

Meni se pari da su svi oni koji to izmišljaju jena vela mutež, jer ako ikor jema dobru vodu onda je to Split.

Ni Dioklecijan bi lud kad je ovod učinija palaču, a učinija je zaraj dobre vode i akvaduktima je dove u palaču.

Poza puno godin je i Bajamonti pokrenija dovođenje vode u grad i pokrenija izgradnju funtani da grajani Splita jemaju di vazimjat vodu.

Poza pusti godin ča voda iz izvora rike Jadro doliza u Split, a nakon ča se počela prodavat voda u boce, oli kante, počela su se dogajat i zamućenja vode, koje prin tega nikad nije bilo.

Niki govoru da nima nikega čistača za vodu, pa ako je tako, ča ga nisu ugradili, oli nisu jemali vrimena, oli grad, oli Vodovod nimaju pinez za kupit ti čistač, a mogli su ga kupit samo da su naplatili vodu onima koji su se ilegalno prikjučili na hidrante i godinan arčili mukte vodu i nikon ništa.

Mora in je to nikor i omogućit jerbo nisu to sami mogli učinit, a Vodovod mora jemat evindenciju koliko vode uđe u cijevi i koliko se naplati i ni vrag da su to sve kontali ka gubitke u cijevima.

Ako van triba čistač o vode, ča čekate, ugradite ga ili ćete nas nakon svake kiše kad izvor Jadra nabuja i dalje ovako za*ebavat.

Ako je voda zamućena i ako ni dobra za pit, ni zdrava, onda bi vajalo da na prvoj sjednici Gradskog vijeća Splita pozovu sve poteštate u zadnji 27 g. ka i sva rukovodstva Vodovoda u tin godinan i dat in da loču tu vodu, a ka božićni poklon dat in i da odnesu doma svaki po kantu od deset litar te nevajale vode jer su oni najveći krivci ča se to dogaja.

Za svake pi*darije u gradu jema pinez, samo nima za čistač vode, za autobuse, za božoćnice onima koji jemaju mali penšjun, oli su nezaposleni, a nima pinez ni za uredit Merjan , ali nać će se pinez za zapošljavanje oni ča ih zovu uhljebi…


Moja reakcija na članak je...
Vau
0
Haha
0
Hagić
0
Hmmm
0
Plač
0
Grrr
0
Molim?
0