Ućini san pižolot, sidin, pijen kafu, zapali san španjulet i gledan noćnega kovača kako misi tisto za fritule. Gledan nju, a vidin pokojnu mater.

Ma ča mi je ovo došlo, oli mi se poćelo prićinjat, vidin mater kako misi tisto, kako grata koru o naranće, limuna, meće suvice i ulije dvi tri kapje rakije u tisto za ćinit fritule.

Svojin dugin prstima već pomalo smežuranin meći tisto, mekla je teću na špaker punu uja, nikako nježno vata prstina to ućinjeno tisto, stišće ga palcon i kažiprston, skida kućarinon i meće u ugrijano uje.

Čutin vonj, vidin kako ih lagano okriće da dobiju onu lipu koluru, a poza malo vrimena ih vadi i meće u stanjadu koju je vadila iz kredence samo o blagdani. Posipje ih sa mlivenin cukron i vidin sebe kako dolizan iza nje i vazimjen koju za izist, a ona onako šerjasto ka da neće govori mi, ne ji sad, popit će mi uje.

Evo proliza i deseta godina da je nima, je uvatila je lipe godine i praunuku je doćekala, ma ja jopet ne mogu virovat da je nima i san sebi ne mogu rastumaćit kako to da je nima, a ja je vidin, ovod je i ćini nan fritule.

Nikad joj nisan reka majko, oli mama, more bit i da jesan u onin najranijin danima koji se ne spominjen, ma okad znan zase uvik san je zva MA.

Čarolija se nastavja i gledan je, jema nase kotulu, niku staru bluzu, a mekla je i traveršu su dva vela žepa i vezala je oko struka sa fjokon na kostima, a ja dojden iza nje i potegnen oni fjok da se traverša rastvori, okrene se i samo mi reće, muzuviru jedan samo znaš dišpete ćinit.

Čutin vonj bakalara, uja, kapule, luka i petrsimula ma i malo bilega vina, a i konšerva je blizu, jerbo se kuva bakalar na brujet, a biće i bjanko .

Smežurane ruke moje matere koje već i pomalo drću, mišaju drvenon zlicon šufiganu kapulu i luk, dodaju zaćine i bakalar i konšerve i malo suvic, a na drugu ploću na banja mariju kuva se bakalar bjanko i mećije uje, onoko koliko ga more bakalar popit i sve grinta koliko ovo gre uja maslininovog.

Jesan li ovo pošepja, jeli mi se ovo priviđa, ča mi se dogaja, ne mogu ni san sebi objasnit, ma vidin je, gledan je, čujen joj glas, zdignen se sa šofaja, gren vidit ča sad ćini, jerbo vidin da kuva juvu o bakalara onako malo crvenkastu sa malo angriza, dojden blizu špakera, a nje nima, okrićen se, zoven je, MA, ma mi se nikor ne odazivje i nikako se čutin prazan, pa iako nisan višje dite, već čovik koji će za nikolko godin jemat sedandeset godin, judi moji, fali mi, puno mi fali, a najskoli kad dojdu ovi blagdani.

Falu mi one smežurane ruke, ispijeno lice puno bor od godin i truda, falu mi oći ča su sa jubavju sjale, fali mi da je pojubin, da joj ućinen koji dišpet, da mi reće muzuviru jedan, a jopet znan iako je nima da je ovod snamon u mojin misliman i da nije partila sve dok san ja živ, jerbo živi u meni i snamon.

MA, ANE MOJA, FALIŠ MI, PUNO MI FALIŠ I NIKAD VIŠJE ONAKI FRITUL, ONAKEGA BAKALARA I NA BRUJET I BJANKO I ONI JOĆIJU ČA SU ME SA JUBAVJU GLEDALE.

Spavaj u miru stara moja, jer onod di si ti fermala, mi smo nastavili, ma brez onega gušta kad si ti bila snan.


Moja reakcija na članak je...
Vau
0
Haha
0
Hagić
0
Hmmm
0
Plač
0
Grrr
0
Molim?
0